Daan-daang mga isda ang natagpuang naglulutangan sa bahagi ng Manila Bay malapit sa Baseco compound sa Maynila nitong Huwebes ng umaga, Setyembre 17, matapos ang isang gabi ng malakas na pag-ulan sa Maynila. Dahil sa kontrobersiya hinggil sa pagtatambak ng dinurog na dolomite upang magmukhang white sand sa bahagi ng Roxas Boulevard, hinihinala ng ilan na baka nakalason ang dolomite sa tubig. Ngunit binigyang-diin ng Department of Environment and Natural Resources (DENR) na ang “white beach” project ay may ilang kilometro ang layo mula sa Baseco at sa mga naglulutangan ditong mga patay na isda. Hindi naman ito ang unang pagkakataon na nasaksihan ang paglutang ng mga patay na isda sa bahagi ng mga lake, golpo at bay sa bansa. Noong Mayo, daan-daang tonelada ng tilapia na inaalagaan sa mga fish cages sa Taal Lake, Batangas, ang patay na naglutangan dahil sa pagbaba ng oxygen level sa lawa dahil na rin sa dami nang mga fish cages doon.

Ang fish kill sa Manila Bay. (2020, September 22). Balita, p. 4.